Transport vazirligi inspektorlari ma’muriy bayonnomalarni endi planshetlar orqali rasmiylashtiradi
Transport vazirligi tomonidan avtomobil tashuvlari sohasida huquqbuzarlik sodir etgan shaxslarni aniqlash, ularga nisbatan ma’muriy huquqbuzarliklar to‘g‘risidagi ishlarni rasmiylashtirish va ko‘rib chiqishda elektron tizim o‘rnatilgan planshetlardan foydalanish yo‘lga qo‘yilmoqda.
O‘zbekiston Respublikasi Vazirlar Mahkamasining 2021- yil 8 - iyuldagi “Ma’muriy huquqbuzarliklar to‘g‘risida ishlarni yuritishning elektron tizimini joriy etish bo‘yicha qo‘shimcha chora-tadbirlar haqida”gi 431-sonli qaroriga muvofiq, shuningdek, Transport vazirligi xodimlari tomonidan zamonaviy axborot texnologiyalaridan keng foydalangan holda avtomobil tashuvlari sohasidagi ma’muriy huquqbuzarliklarga oid ishlarni rasmiylashtirish va ko‘rib chiqishning soddalashtirilgan tartibini joriy etish maqsadida yangi tartibda ishlashga o‘tilmoqda.
Dastlabki bosqichda avtomobil tashuvlari sohasidagi ma’muriy huquqbuzarliklar to‘g‘risidagi ishlarni ko‘rib chiqish va rasmiylashtirish elektron tizim o‘rnatilgan planshetlar orqali Toshkent shahar va Toshkent viloyati transport boshqarmalari tomonidan amalga oshiriladi.
Planshetlardan foydalangan holda ma’muriy bayonnomalarni rasmiylashtirish jarayonini amaliyotda qo‘llashni tashkil etish maqsadida IIV Huquqiy statistika va tezkor - hisob ma’lumotlar markazi bo‘lim boshlig‘i va mas’ul xodimlari ishtirokida tadbir bo‘lib o‘tdi. Tadbirda ma’muriy bayonnomalarni planshetlar yordamida rasmiylashtirish tartibi yuzasidan batafsil ma’lumot berildi.
Tadbir yakunida Toshkent shahar va Toshkent viloyati transport boshqarmalari inpektorlariga biriktirlgan planshetlar topshirildi.
